ll भजन ll - मनुष्य जन्माचा आधारू

ll भजन ll

मनुष्य जन्माचा आधारू

गुरु भासे कल्पतरू

नेत्र शोधोनी उरले पुरू

कोठे मला भेटेल गुरु ll १ ll

एक एक जन्म लागले सरू

हरेक जन्मात काय करू

मनुष्य जन्माचा अर्थ कोणा विचरू

कोठे मला भेटेल गुरु ll २ ll

जरी गुरु शोध झालीया सुरु

क्रियमाण हाती फळ देईना उरू

वर्णिता गुरु थकेल बोरू

हात टेकले; भेटेल का गुरु ll ३ ll

मनीचे माझ्या अवखळ वारू

कोण शकेल त्या सावरू

जीवाचा कोलाहल मी न शके आवरू

कोठे मला भेटेल गुरु ll ४ ll

गुरु ज्ञानाचा सागरू

रूप तयाचे अगोचरू

गुरु जीवन मार्गीचा पांथारू

शोधीतच आहे परी मिळेना गुरु ll ५ ll

आयुष्य लागले आहे सरू

नाही आठवीला आधी गुरु

कशी उणीव ती काढून भरू

साधून घेऊ या अवसरु

कधी भेटेल मला गुरु ll ६ ll

श्री गुरु चरणरज,

सार्थबोध