कविता:- माझ्या घरी घननिळा, श्रावण फुलोनी आहे.......

संसाररुपी वेलीवर बालरूपी फुल उमलणे, हि प्रत्येक आई-बापाची इच्छा असते.

थोडा उशीराच का होईना, पण काहींच्या घरात बाळराजा किंवा एक परीराणी अवतरते.

आपल्या लहानग्या बद्दलचे त्याचे/तिचे मनोगत.......खास करून कामावरून घरी जाताना.

अविश्रांत दिस सरताना, गोकुळीची साद येते
पाहीन कधी साजिरे, दृष्टी पथास आहे      ll १ ll    

हलकेच घरी जाताना, मंद झुळूक भासे
ओढ अधीर झाली, पाऊलांना वेग आहे      ll २ ll    

घरचा ध्यास आता, रोजचा वाढला आहे
माझ्या घरी घननिळा,  श्रावण फुलोनी आहे   ll ३ ll     

भाबडे भाव गोजिरे, दृष्टी असीम आहे
निरागस नजरेत भरुनी, परमेश्वर निस्सीम आहे ll ४ ll     

विश्वात असा आमुच्या, चैत्र बहरला आहे
परमेश्वरी कृपेचा, घन खास बरसला आहे   ll ५ ll   

सांजेस तिमीर भरताना, दीप तेजाळला आहे
लहानग्या तेजात सारा, उद्याचा प्रयास आहे  ll ६ ll   

उपकार त्या विधात्याचे, आमचे भाग्य उदेले
त्याच्याच कृपेने दुडके, पाऊल घरी पडलेले   ll ७ ll     
 

© सचिन पुरुषोत्तम कुलकर्णी

sachin.kulkarni78@gmail.com